Агентууд ямар контент үйлдвэрлэх вэ?

2022-08-05

2022 оны байдлаар нийтдээ 4,62 тэрбум цахим сүлжээний хэрэглэгчид байгаа бөгөөд улиралд 77 сая хэрэглэгч нэмэгдэж байна. Нэг жилийн дотор 10.1%-р өсч байгаа нь цахим сүлжээний хэрэглээ ямар түвшинд хүрч байгааг хангалттай илтгэнэ. Интернет хэрэглэгчдийн 93,4% нь нийгмийн сүлжээг ашиглаж байгаа нь таны хувьд том боломж гэж харж болно.

Энэ хөгжлийг дагаад бизнес эрхлэгчид нийгмийн сүлжээгээр бараа бүтээгдэхүүн, үйлчилгээгээ сурталчилж борлуулалтаа өсгөж байна. Хүмүүс өдөрт дунджаар 2 цаг 27 минутыг нийгмийн сүлжээнд зарцуулж байна. Энэ хугацаа бол таны боломж.

Агентууд зуучилж буй үл хөдлөх хөрөнгийнхөө зургийг мэргэжлийн түвшинд авах нь бараг л наад захын шаардлага болсон гэхэд болно. Вэбсайт дээр байршуулахад эдгээр зургууд мэдээж хэрэгтэй. Таны мэргэжлийн байдлыг нэг талаар үзүүлэх болно.

Тэгвэл та хэрхэн нийгмийн сүлжээний урсгалаас харилцагчаа олох вэ? Хэдхэн жилийн өмнө бидний анхаарлаа хандуулдаг байсан контентууд хоцрогдсон гэхэд буруудахгүй. Үл хөдлөх хөрөнгийн талаар подкаст, блог, нийтлэл, live зэрэг нь хүмүүсийн анхаарлыг төдийлөн татахаа байсан, Яагаад гэж үү? 2017 онд Tik Tok гарч ирснээр хувьсгал хийсэн гэж хэлэхэд болно. Хэрэглэгчид 16:9 формат бүхий зураг, бичлэг зэргээс нэгэнт уйдаж эхэлсэн.

Харин одоо тэд утсаа эргүүлэхгүйгээр контент үзэхийг илүүд үзэж байна. Энэ бол 9:16 формат. Босоо форматтай видео нь ойрын хэдэн жилдээ нийгмийн сүлжээг байлдан дагуулах нь тодорхой боллоо. Энэ форматаар уран сайхны кинонууд хүртэл хийгдээд эхэлжээ. Tik Tok зах зээлд нэвтэрснээс хойш instagram-д reels, youtube-т shorts зэрэг цэснүүд нэмэгдсэнийг та анзаарсан байх. 

Нийгмийн сүлжээний аль ч платформд энэ формат хэрэглэгдэх болжээ. Таны фэйсбүүк стори хүртэл энэ форматаар ажиллаж байна. Та эхний 3 секундэд багтаан тэдний анхаарлыг татаж 15-90 секундэд багтаан тэднийг өөрийн харилцагч болгох боломжтой.

Та энэ хугацаанд юуг үзүүлэх боломжтой вэ? Тэдний анхаарлыг юу татах вэ? Та байрыг бүтнээр нь танилцуулахын оронд хамгийн онцлогтой нэг хэсгийг нь сонирхолтой байдлаар үзүүлэхэд тэд өөрсдөө таньтай холбогдох болно. Та зарах гэж буй хотхоныхоо оршин суугчаас хэдхэн асуулт асуултаар бичлэг хийгээд бусдад хүргэчих. Тэд танд илүү итгэнэ. Та бүгдийг нь байлдан дагуулах болно.

Та өөрөө ярихаас илүү бусдаар яриул. “Бид онлайнаар бараа авахдаа хүртэл review хэсгийг уншдаггүй гэж үү?” Та өөрийнхөө тухай бус, хүмүүс таны тухай ярих ёстой. Хэдий болтол “Зарна” гэсэн тайлбартай хэдэн зураг оруулж, утсаа дугарахыг хүлээж суух вэ?

Та туршаад үзээрэй.