Card image cap

"Итгэл үнэмшил төрүүлэхүйц насанд хүрээд энэ салбарт орвол давуу талтай"

2021-09-21

Гал голомтоо бадраан гэр бүл болсныхоо дараа бидэнд хамгийн түрүүнд тулгардаг сонголт бол амьдрах орон гэрээ төвхнүүлэх байдаг. Иймдээ ч үл хөдлөх хөрөнгө худалдан авах сонголтыг хүн амьдралдаа цөөхөн удаа хийдэг. Магадгүй гэртээ харих бүртээ, хайртай хүмүүсээ жаргалтай байгааг харах бүртээ сонголтынхоо үр шимийг мэдэрдэг байх.

Үл хөдлөх хөрөнгө зуучлагчдыг зөвхөн ашгийн төлөө ажилладаг амьгүй бие мэтээр харах хүн олон байдгийг энэ салбарт ажилласан өрнөл ихтэй нэг жилийн хугацаанд би биеэрээ мэдэрлээ. Гэвч үнэндээ бид гэр бүл төлөвлөлт ба амьдралын хэв маягийн зөвлөх, барилгын инженер, зах зээлийн хэтийн төлөв судлаач, хувийн менежер, хуульч гэх мэтчилэн олон чиглэл рүү хувирч ажилладаг. Ийн хичээх шалтгааныг өнгөц харахад мэдээж үл хөдлөх хөрөнгө худалдан борлуулах зорилго бий. Харин өнгийн харж чадвал зуучлагчдын нэг ч гэсэн гэр бүлд аз жаргал, гэрэл гэгээ нэмэх гэсэн чин сэтгэл харагдана.

Намайг Мөнгөнсэлэмийн Ганбилэг гэдэг. Та бүхний харж байгаачлан би олон улсын Century 21 үл хөдлөх хөрөнгийн агентлагуудын сүлжээний Signature оффист ажилладаг. Жилийн өмнөх М.Ганбилэгийг эргэн харвал дөрвөн хүүхэд төрүүлж өсгөсөн, барилгын талбайгаас 10 жил хөндийрчихсөн барилгын инженер эмэгтэй байв. Үүний дээр цоо шинэ салбарт орж ажилласныг нэмбэл өөрийгөө голох шалтгаан мундахааргүй олон байгаа биз? Гэвч эргэлзээ минь удаан үргэлжлээгүй юм. Би эхний сардаа таван байр борлуулчхаад үнэхээр зөв газраа ирж дээ гэж бодсон. Зам зуурт мэдээж бүтэлгүйтэх явдлууд бишгүй олон тохиолдсон. Шантрах үеүдэд нөхрийн минь хэлсэн “Алдаж болно, хамгийн гол нь алдаагаа давтахгүй байхад анхаарлаа хандуулбал дараагийн алдаа чинь алдаа биш болно” гэсэн үг надад урам зориг өгдөг байв.

Дөрвөн хүүхдээ төрүүлж өсгөсөн 10 жил миний хувьд хэрхэн давуу тал болсон тухай түүхээсээ товчхон хуваалцъя. Хүүхдүүд минь дөрвөн өөр бие хүмүүс тул өөр зан ааш, харах өнцөгтэй. Хэрэв эх хүн биш энгийн залуу охин тэднийг минь харвал байдаг л дөрвөн хүүхэд байна даа гээд өнгөрч магадгүй. Харин эх хүн бол хүүхдээ харах бүрд мэдэрч, сонжиж байдаг. Тэд минь өлсөж үү, өвдөж үү гэх мэт яг юу хүсээд байгааг нь анзаарч сурдаг буюу өөрөөр хэлбэл жижиг деталиудыг ажиглаж, мэдэрч сурдаг. Яг л энэ туршлага маань надад харилцагчаа хараад хүсэл зорилгыг нь тодорхойлж, хэрэгцээг нь мэдэрч, анхааралтай сонсож, өөрийгөө тухайн хүний байр сууринд тавьж чин сэтгэлээсээ ойлгоход тусалдаг.

Одоо бол би энэхүү мэргэжилдээ дурласан. Харилцагчтай уулзах чухал өдөр нойр ч хүрэхгүй үүрээр сэрж, алхах замдаа хэлэх үг, гишгэх алхмаа бодсоор орсон өдрүүд олон байв. Огт ажиллаж үзээгүй салбарт орж бүхнийг шинээр сурч, өөрийгөө сорьж байгаа хүнд эдгээр нь байдаг л асуудал. Аливаа мэргэжлийг эзэмшихэд мэдээж хичээж байж л үр шимийг нь хүртэнэ шүү дээ. Тиймээс ч ажиллаж эхлээд жил ч хүрэлгүй өргөмжлүүлсэн “Masters Ruby” цол маань ахиц дэвшилдээ урамших бас нэгэн шалтгаануудын нэг болсон юм.

Үл хөдлөх хөрөнгийн зуучийн хувьд надад баримталж явдаг хэд хэдэн зарчмууд бий. Би ажлаа нэг байр зараад л дуусах түр зуурын явдал гэж огт хардаггүй, үр дагавруудыг нь байнга бодолцдог. Байр түрээслүүлэхдээ ч 50, 60 хүнээс тухайн байрыг өөрийн гэр орон шиг хандаж чадах зөв нэгнийг сонгохыг хичээдэг. Цаашлаад байр борлуулахдаа бүр ч илүү болгоомжтой, сэтгэлээсээ хандах ёстой гэж боддог. Харилцагч маань байрныхаа босгыг давахдаа, анхны их цэвэрлэгээгээ хийхдээ сэтгэл дүүрнээр “Энэ байрыг тэр охины ачаар олж авсан шүү” гэж бодоосой гэж хүсдэг учраас тэр шүү дээ.

https://c21.mn/uploads/c21.mn//1632217916-mara2117.jpeg

Барилгын инженерээр ажилласан ахархан хугацаанд мэдэрсэн чухал зүйл бол бүтээн байгуулалтаас төрдөг бахархам мэдрэмж. Энэ салбарын мэргэжилтнүүд бүгд л энэ мэдрэмжийг мэдэрч үзсэн гэдэгт эргэлзэхгүй байна. Дэргэдүүр нь өнгөрөх бүртээ миний барьсан барилга, миний тавьсан зам шүү дээ гэж бахархан бодох сайхан. Харин үйлчилгээний салбарын мэргэжилтнүүд харилцагч, үйлчлүүлэгчдийг хэрэгтэй үйлчилгээгээр нь хангаж баярлуулдаг. Эдгээрийг хослуулсан үл хөдлөх хөрөнгө зуучлалын салбартаа улам л дурлаж явна. Тиймээс хүн амьдрах зориулалтгүй, алсын хараагүй, оршин суугчдад ээлгүй барилгууд олширч байгаад дотроо битүүхэн харамсаж явдгаа хэлье. “Энд хүмүүс гарч салхилна, энд хүүхдүүд тоглож настай буурлууд маань нарлана даа, оршин суугчид маань гэр бүлээрээ он удаан жил амьдарна даа” гэж бодолгүй, барьж дуусгаад борлуулаад л миний хийх ажил дуусна гэсэн хандлагатай байх нь олон. Зуучлагч хүний хувьд сэтгэл зүрхээ шингээж барьсан байрыг борлуулахад урамтай байдаг. Тиймдээ ч би алсдаа оршин суугчдадаа ээлтэй цогцолбор хотхон барьж, гайхалтай бүтээн байгуулалт хийхийг мөрөөдөж  яваа.

Үл хөдлөх хөрөнгийн зуучлагчдадаа бяцхан зөвлөгөө өгье гэвэл зах зээлээ мэдэрч, прогноз хийх ур чадвараа хөгжүүлэхэд анхаараарай гэж хэлмээр байна. Нийгэм, эдийн засаг, улс төрийн нөхцөл байдал, валютын ханш, үйлдвэрлэл гэх мэт олон талын мэдлэг, мэдээлэл цуглуулж, мөн амьдралын туршлагаа ч ашиглаж байгаарай. Хоёрдугаарт, худалдан авагчийнхаа амьдралын хэв маяг, хэтийн төлөвлөгөөг асуухад хэзээ ч буруудахгүй шүү. Ажил, хүүхдийн сургууль, цэцэрлэгийн байршил, амьдрал нь аль бүсэд илүү өрнөдгийг асуухаас эхлээд бүр хүүхэдтэй болоод өвөө, эмээд нь түр харуулах хэрэг гардаг учраас ойрхон байр авахыг зөвлөсөн тохиолдол ч бий. Энэ өнцгөөс нь харвал, итгэл үнэмшил төрүүлэхүйц насанд хүрээд энэ салбарт орж ажиллавал илүү давуу талтай гэж боддог.

Эцэст нь манай захирал “Том загас барьж сурахын тулд жижиг загас асуудалгүй барьдаг болох хэрэгтэй” гэж зөвлөснийг иш татмаар байна. Энэ салбарт ажилласан туршлагагүй ч зоригтой бөгөөд тууштайгаар хичээж, алдаж онож, суралцаж явбал шантрах шалтгаан тэр хэрээр багасаж ахиц дэвшил гаргах болно оо. Амжилт хүсье.

https://c21.mn/uploads/c21.mn//1632217919-img-3033.jpeg

М.Ганбилэг

CENTURY 21® Signature Борлуулалтын Мэргэжилтэн

*2020 оны Master's Ruby шагналын эзэн