Card image cap

Амжилттай хэлэлцээр хийх 7 дүрэм

2021-09-21

Хүн бүр өдөр тутмын амьдралдаа байнгын борлуулалтын харилцаанд оролцож байдаг. Хамгийн чухал нь бусадтай харилцахдаа борлуулалтын арга, тактикийг хэрхэн ашиглаж байгаагаас хамаарч шилдэг борлуулагч мөн эсэх нь харагддаг. Би амжилттай хэлэлцээр хийхэд өөрийн олж авсан арга туршлага дээр үндэслэн дараах 7 зөвлөгөөг танд хүргэж байна.  

1-рт Та ямар ч нөхцөлд, ямар ч хүнтэй хэлэлцээрт орох магадлалтай тул үргэлж бэлтгэлтэй бай. Ямар ч тохиолдолд өөрийгөө зөв илэрхийлж баттай байр суурин дээр зогсох нь амжилттай хэлэлцээрийн эхлэл юм.

Танд асар их туршлага мэдлэг байвч хэт өөртөө итгэлтэй байх хэрэггүй. Хамгийн туршлагатай агентууд өөртөө хэт их найдсанаас, мөн ажилдаа хайхрамжгүй хандсанаас болж уулзалтдаа бэлтгэлгүй ирснээр тэдний хэлэлцээр амжилтгүй болдог. Хэрэв та өөрийн уулзалтдаа 1 цаг зарцуулна гэж дүгнэж байгаа бол 3 цаг бэлдэх хэрэгтэй, хэрэв 15 минутын уулзалттай бол 45 минут тэрхүү хэлэлцээрт бэлдээрэй.

2-рт Уулзалт, хэлэлцээрийг урьдчилан таамаглах боломжгүй тул уулзалт хийх хугацаандаа цагаа шалгаж байгаарай. Заримдаа 10 минут уулзана гэж бодсон ч бүхий л өдрийг алдах тохиолдол байдаг. Тийм явдал гаргахгүйн тулд уулзалтын цаг хугацааг тогтоож, урьдчилан цагаа төлөвлөх нь маш чухал юм.

3-рт  Хэлэлцээр хийж байх явцдаа санаагаа товчхон тэмдэглэхийн тулд тэмдэглэл буюу протокол хөтөлж заншаарай. Түүнчлэн өмнө нь ярилцаж байсан асуудлаа дахин дурдаж сануулж байх нь цаашдын харилцааг зогсоолгүй үргэлжлүүлэх нэгэн хүчин зүйл болно. Гэвч дараагийн уулзалтуудыг ижил асуултаар эхлэхгүй мөн олон давтахгүй байх нь чухал гэдгийг санаарай.

4-рт  Гол шийдвэр гаргахгүй хүнтэй хэлэлцээр бүү хий. Жишээлбэл, эмээгээ өөрийн талд оруулах гэж хэлэлцэх шаардлагагүй байдаг. Учир нь ямар ч асуудал тохиолдсон таны эмээ таны талд л зогсох болно шүү дээ. Мөнгө төлж байгаа хүнтэй буюу худалдан авагчтайгаа гол нөхцөлөө тохиролцох хэрэгтэй.

5-рт Мэдээжийн хэрэг асуудал үргэлж тулгарна, гэсэн хэдий ч та аль болох бага зөрчилдөхийг хичээх нь маш чухал. Хэлэлцээр хийх явцад "Үгүй", "Гэхдээ" гэсэн үгсээс зайлсхийх хэрэгтэй, эс бөгөөс таны харилцагчид эдгээр үгс нь түүний хэлсэн санааг огт авч үзсэнгүй, хайхрамжгүй хандаж байна гэсэн дүгнэлт хийх болно. Амжилттай борлуулагч өөрийн үгийн сангаас "Гэхдээ" гэсэн үгийг бүр мөсөн авч хаядаг. Учир нь "Гэхдээ" гэдэг үгийг сонссоны дараа хүний эсэргүүцэх сэдэл төрдөг байна. Жишээлбэл, эмэгтэй хүнийг магтан сайшаах гэж оролдохдоо "Сувдаа, чи үзэсгэлэнтэй харагдаж байна гэхдээ жингээ хасвал илүү сайхан харагдах болно” гэвэл мэдээж сөрөг мэдрэмж төрнө шүү дээ.

6-рт  Хэлэлцээрт оролцож буй хүмүүстэйгээ үргэлж хүндэтгэлтэй харилцаж тэдний цагийг үнэлдэг байгаарай. Уулзалтын үеэр байнга гарч утсанд хариулах гэж яаралгүйгээр гар утсаа унтраагаад ярилцаж буй хүндээ төвлөр. Энэ нь та яриаг анхааралтай бөгөөд сонирхон сонсож байгааг илэрхийлдэг.

7-рт Хэлэлцээрийн үед хэтэрхий их ярих хэрэггүй. Аль болох асуулт асууж, анхааралтай сонсдог байснаар та хэлэлцээрийг удирдан чиглүүлэх болно.

https://c21.mn/uploads/c21.mn//1632217249-q62a2649.png

Б.Солонго

CENTURY 21® Top Realty

Брокер Эзэмшигч